Schnitzelbanken und Bilder

image-7010017-Die Lustgurken.JPG





Und hier unsere Schnitzelbank-Sprüche 2018:







Unten ein Ausschnitt unserer Schnitzelbank-Sprüche von der Fasnacht 2018.

(und wie immer, wer eines der toll gestalteten Bilder erwerben möchte: einfach in der Hohe Lust melden)


(Der link führt zu "Dropbox")

Diese Bilder wurden von Claudia Bohner zur Verfügung gestellt.
Vielen Dank Claudia.
Als Velodorf isch Thal scho weltbekannt
Und drum hockt au dä Heiko Schuhkraft ufs Velo, s isch aller hand
Als Bänkler und Hobbyjasser isch er sich eher as bequem hocke gwöhnt
Und so hät er uf dä Fahrt um dä Bodesee scho bald ä chli gstöhnt
Zmal hät er so Schmerze, was isch jetzt au passiert
Unterwäg s isch er zum Dokter und dä hät gad än Muskelkater dignostiziert
Dunnschtig-Gsellschaft tuet äs Bobbycar-Rennne organisiere
S erschtmal am Chällerfest wend s meh Lüüt zum mitmache animiere
So sind dänn alli Vereinspräsidentä mit am Start
Als Organisator glingt am Peter Hensel di schnellschti Fahrt
Am Peter isch äs nöd emal peinlich, ä sonen Sieg chame nöd plane
Mir säged jetzt nöd wa bisch, aber wötsch ä Banane
Da Thaler Chällerfäscht isch scho ä ewigi Gschicht
Scho ä Wuchä vor öm Fäscht isch d Männerriegä nöd ganz dicht
Bim irichtä vo irem Laterndlichäller händs nöd vill studiert
Und händ das schön Räbebild komplet verchert montiert
Dänn müend halt alli Gäscht im Handstand stah
Damit en jede cha das Bild verstah
Dä Hampi Balmer hett es Zündhölzli azündt und das hät ä Flamme geh
Und er hät fürs Jätt bi dä Hecke welle Füür vom Hölzli neh
Und dä Flammewörfer brennt
Jo do hät er gär nünt kennt
Und das Uuchrut isch ewäg i numä eim Moment

Jo me weiss wa cha passiere wemme nöd ufpasst mit Füür
für d Vetilgig vo dem Uuchrut isch sini Hecke doch denn z tüür
Und vom Lebhag hett o Gruus  chönne s Füür is ganze Huus
Und wer weiss wa do nöd alles no wär worde druus.
Öppert het telefoniert und denn isch diä Füürwehr cho Und das het denn au bald gnützt
Dank dene Chübelträger isch alles glöscht bevor d Füürwehr ufchrützt
Trotz dä unfähige Füürwehr isch dä Hampi mega froh
Er chunnt trotz sim blöde Lapsus mit em Schrecke no devoo
Als alti Schnitzelbankkollegä gemmer dir än guete Rot
Dass s Jätte au ganz gfoorlos mit dä Nagelschär got
Im Fall Hefehofe händ im letschte Summer Tierschützer i all nä Medie agfange hetze
Will dä Kanton Thurgau über 10 Jahr brucht hät zum s Tierhalterverbot dure d setze
Bi üs im Kanton Usserrhode gaht so öpis ganz flott
I nu 5 Jahr setzed s dure am Buur Büsser sis Tierhalterverbot
Mä ghört dä Büsser jammere, alli Viecher händs mer gnoh
Nu die dumme  huere Flüge händs mer no loh
Am Chällerfäscht hät s äs grosses Starufgebot gha
D Helene Fischer singt und au dä Gabalie stellt sin Maa
Im Fäschtzelt gaht d Poscht ab, d Stimmig isch famos
Was macht dänn dä Röbi Raths uf dä Bühne blos
Er gaht voll ab und spielt Gitarre mer hört in bis i Kruft
Bim gnau hi lueg gseht  mer, dä Röbi produziert wider emal nu heissi Luft
Es isch chalt wordä im Herbst, es isch wider Winterzyt
Nu d Uhr im Chindergartä isch na nöd so wiit
D Monica Stieger entlaht d Chind ä Stund z früe am Mäntigemorge
Unverhofft stönd d Chind dä hei vor dä Tür, d Müetterä telefoniered voller Sorge
Dä Geni Kamber büesst starch für dä Monica irä Hänger
Er mues Goofe go i sammlä als Chinderfänger
E riese Katastrophe isch passiert, äs ganzes Land isch platt
D Fuessball WM z Russland findet ohni Italie statt
Ä WM ohni Italie isch wie ä Pizza ohni Bode
Da chratzed sich sogar dä Jogi Löw am Chopf
D Italiener müend gar nüme so lamentiere
Si chönd ja mit Liechtestei und Gibraltar äs Trainingslager organisiere
Di erscht Regierigsbildig nach dä Wahle in Dütschland isch total i d Hose
D Jamaika-Koalition hett s söle gäh, aber d FDP hät nöd wele lose
Wuchelang hät d Angela Merkel mit dä Parteie debartiert
D Idee vo dä Angi händ di Liberale eifach nöd kapiert
Di Dütsche sind gschieteret mit Jamaika
Zum Glück hämer vorher na ä Foti gmacht mit üsere Leica
Da Jahr isch gsi am WEF z Davos
Wieder emal richtig vill los
Rund um dä Trump gits äs riesigs traraa
Er reist i d Schwiz mit 1500 Maa
Der einzig wo nöd i gladä isch, isch dä Kim Joung-un dä löli
Dä hockt sicher im Sertigtal innere Höhli
Als Maa fühl ich mi i letschter Zyt wahnsinnig unter  Druck
Mit därä Sexismusdebatä chömed sogar mir Lustgurke is schlächti Liecht ruck-zuck
Im Bundeshuus hät mer Parlamentarier mit änerä Benimm-Broschürä erzogä
Mir fräged üs sind die dänn z Bern obe alli so geili Chogä
D Schwede mönd s jetzt vor äm Sex än Handschlag gäh, da mag für die Junge na gah
Aber i üsem Alter bliebt er chum me so lang stah
Dä Gründer Hugh Hefner vom Playboy isch gstorbe
Er hät s ganz Läbelang um schöni Frau gworbe
Aber tusigi vo Fraue sind im Rampeliecht gstande
Öpe eini hät dä gross Durchbruch chöne lande
Us sim Nachlass vom Playboy sind üs zue gspielt worde exklusivi Bilder
Mir zeiged eu nur äs bravs, die andere wäred no vill wilder
Bim Raphi Barmettler sim Grillfäscht luegt dä David Dörig sis Gartebänkli a
Dä Raphi seit, wennds hüt mit nimsch chasch es gratis ha
Wenn s öpis vergäbe git gaht dä David über Liiche
Und so gseht mer en z Nacht mit äm Bänkli uf em Buggel dä Berg uf schliiche
Uf äm Heiweg häts schienbar niemer gseh, d Alice heti das chum verchraftet
Wenn d Polizei dä David als Bankräuber het verhaftet

Dä TV-Lutzeberg gaht is vergoldet Gstell go grilliere
Nach dem gmüetliche Abed will dä Pfister mit sine Fahrkünst brilliere
Mit emene tiletantische Manöver macht er bim Leihauto vom Hotz en riese Schade
5000.00 Stutz hegs koschtet, dä bi heger nöd emal gha en Flade
Mit somene gosse Chare chönd halt nöd alli umgah, muesch jetzt nöd plare
Für di besser Übersicht würsch gschieder äs chlieses Auto fahre

D Jolanda Neff und dä Thomas Litscher fahred uf äm Bike grandios
Sie holed 2 WM-Medalie s isch ganz famos
Am Empfang werded sie nach äm Erfolgsrezept  gfraget
Dä Litscher seit mir sind ja z Thal scho lang vo Baustelle plaget
Für villi Bürger sind die riese Baustelle äs Elend
Für üs isch das aber äs super Trainingsgländ

Dä Röbi Raths isch mit ä paar Kollege uf Töfflitur gange
Scho bald bliebets innere Polizeikontrolle hange
D Schnäpper sind alli in ornig, nu weg äm Röbi sim Helm händs öppis z motze
Er treit ebe sin alte vom Militär mit dä Bezeichnig „ MP“, die Beamte tüend nu blöd glotze
Dä Röbi seit eu häts im Hirni meini au na nöd glüütet
Wüssed ihr dän nöd das MP „ Mister Präsident“ bedüütet


Chum s Gmües uf glade im Eselschwanz, scho isch äs passiert
D Melanie Risch hät bi dä Autobahnunterfüerig vom Lieferwage s Dach abrassiert
Si hockt  verstöhrt im kaputte Auto und stöhnt
Als güebti Riiteri isch si sich nu a 1 PS gwöhnt
Mir händ än Vorschlag dä gseht us asä süess
Wänd i Zuekunft würsch ä so ume tue dis frische Gmües
Wiit ume isch bekannt dä Musikant Gus
Er isch sit villne Jahre für d Räbefurzer ä grosses Plus
Aber sini Frau Brigitt tuet villfach nu na ä lei spaziere
Sit neuschtem gseht mär dä Gus mit 2 junge Chatze flaniere
Gäll Gus i dim gsetztere Alter muesch zue gäh, das stimmt
Das d Chatze nu na bi dir bliibed wämmers a d Leine nimmt
Nach dä erfolgriche Abstimmig  zu dä Hängebrugg vo Grub, seit dä Werni Meier zu dä Betty
Das isch ä cooli Sach ä Brugg so eini wetti
Ä so nä Hängebrugg z wüsched Lutzeberg und Wienacht wür dä Zämhalt stärche
Und min Weg is Gmeindshuus wär erscht na chürzer zum go wärche
Mir findet s aber gar nöd guet mir chönted plare
Dän isch dä Werni i 10 Jahr no Hoptme, wenn er au nüme cha Auto fahre